Кара-Балтада килем фабрикасынын ордуна текстиль чыгарган ишкана ачылат. 800-1000 жумуш оруну түзүлөт
Кара-Балтада иштебей турган килем фабрикасынын ордуна текстиль иштеткен ишкана ишке кирет. Долбоор 25 млн долларга бааланууда. Бул тууралуу бүгүн, 24-декабрда өткөн брифингде Инвестициялар боюнча агенттигинин министри Нурадил Баясов билдирди.
Анын айтымында, 2022-жылы агенттик алтыдан ашык инвестициялык долбоорду ишке ашырууну пландап жатат жана анын ичинде токтоп турган Кара-Балта килем фабрикасын кайра ишке киргизүү пландалууда.
«Акыркы 4 айдын ичинде инвестор менен келишим түзүүгө жетиштик, ал бул долбоорго 400 миң доллар инвестиция салды. Бул жаңы текстилдик кластер, анын алкагында коңшу өлкөлөрдөн айырмаланып, жаңы продукция – флис өндүрүлөт жана КРгы текстилден чыккан калдыктар ушул фабрикада кайра иштетилет», – деди ал.
Ошондой эле ал сүйлөшүүлөрдүн жүрүшүндө инвесторлорго Кыргызстандын мүмкүнчүлүктөрү жана ишкерлерге берилген жеңилдиктер тууралуу билдиргенин айтты.
Ишкана 2022-жылдын аягында ишке кириши күтүлүүдө жана анын өнүмдөрдү экспорттоо боюнча жакынкы 4 жылга келишимдери бар. Ошондой эле компания 800-1000 жумуш оруну менен камсыз кылат.
