Кыргызстан 2020-жылы коронавирус менен күрөшүү үчүн донорлордон жана «Центерра Голддон» 424 млн доллар алды
Кыргызстан былтыр эл аралык донорлордон жана канадалык алтын өндүрүүчү Centerra Gold Inc. компаниясынан коронавирус менен күрөшүү үчүн 424 млн доллар алган. Бирок бул акча өз максатына карата жумшалган эмес. Бул тууралуу өткөн ишембиде, 25-декабрда, Министрлер кабинетинин жылдын жыйынтыктоочу жыйынында президент Садыр Жапаров билдирди.
Жапаровдун айтымында, эл аралык донорлордон 350 млн доллар коронавирус менен күрөшүүгө үч багыт боюнча бөлүнсө, дагы 74 млн доллар «Центерра Голддон» түшкөн.
«Тилекке каршы, бул каражаттар максаттуу жумшалган жок. Жаңы ооруканалар курулган жок. Бардыгы бюджетти колдоого кетти», – деди ал.
Президент быйыл коронавируска каршы күрөш улантылганын кошумчалады. «Бул вирус бизди ар кандай штаммдар менен коркутуп келди. Бирок биз аны жеңдик», – деди Жапаров.
