Улуттук банк кечээ, 27-декабрда бул айдагы экинчи жана быйыл он бешинчи интервенцияны жүргүздү. Өсүп жаткан суроо-талапты канааттандыруу үчүн коммерциялык банктарга 65 млн 950 миң доллар сатылды.

Доллардын бардык көлөмүн сатуу интервенция жасалган күндөн башка датадагы эсептешүүлөр менен ишке ашырылган, башкача айтканда, банктар бул каражаттарды кийинчерээк алышат.

Белгилей кетсек, бүгүн valuta.kg порталынын маалыматы боюнча, Бишкекте америкалык доллардын орточо базардагы сатуу курсу 84.95 сомго жетти.

Акыркы жолу Улуттук банк валюта рыногуна доллар сатуу боюнча интервенция менен 7-декабрда чыккан. Анда УБ быйылкы рекорддук көрсөкүчкө жетип, 71.3 млн доллар саткан эле.

2021-жылы жасалган 15 интервенцияда УБ доллардын өсүшүн кармап туруу үчүн эл аралык резервдерден 698.95 млн доллар коротту.