Казакстан КР менен чектешкен 4 өткөрмө бекетти убактылуу жапты
Казакстан КР менен чектешкен жердеги «Кең-Булуң», «Токмок» жана «Ак-Жол», «Ак-Тилек» өткөрмө бекеттерин бир тараптуу жапты. Бул тууралуу Улуттук коопсуздук боюнча мамлекеттик комитеттин (УКМК) Чек ара кызматы 7-январда билдирди.
Чек ара кызматынын басма сөз кызматы билдиргендей, бүгүнтөн тарта аталган пункттардан адамдардын жана автоунаалардын өтүүсү убактылуу токтотулат.
«Учурда 7 өткөрмө бекеттеринин төртөө жабык. Азыр пиар менен алектене турган мезгил эмес, бардык чек аралар жабылып калса Кыргызстанга товарлар, анын ичинде ун да келбей калат. Буга депутаттар жооп береби же унду өздөрү алып келеби? Жоопкерчиликти өз мойнуңарга алышыңар керек»,– деди Ташиев депутаттарга Казакстанга аскер кызматкерлерин жөнөтүүгө макулдук берүүгө чакырып жатып.
Белгилей кетсек, бүгүн, 7-январда Казакстандагы митингге байланыштуу Жогорку Кеңештин кезексиз жыйыны өтүп, Жамааттык коопсуздук келишими уюмунун (ЖККУ) алкагында Кыргызстан Казакстанга аскер жөнөтүүгө депутаттар макулдугун беришти.
Эскерте кетсек, Кыргызстан буга чейин казак жарандарынан чек арадан өтүүдө ПЧР тест талап кылбай турганын кабарлаган болчу.
