Улуттук банк 12 кг алтын куймаларын сатып баштады. Бир куймасы канча турат?
Улуттук банк бүгүн, 1-февралдан тартып, атамекендик өндүрүштүн 10-13 кг алтын куймаларын сатыкка чыгарганын билдирди.
Аффинаждалган алтын куймалары «Кыргызалтын» ААК тарабынан 10 900 граммдан 13 400 граммга чейинки салмакта даярдалган жана куйманын лигатурдук салмагынын кеминде 99.95%ын химиялык таза металл түзөт.
Алтын куймаларынын баасы канча?
Улуттук банк 12 килограммдан 13 килограммга чейинки куймаларды сатыкка койду. Эң кичине куймасынын баасы – 58 млн сом (12.3 кг) болсо, эң чоңу – 64 млн сомдон (13 кг) ашат.
| Куйманын № | Куйманын химиялык таза салмагы, г | Куйманын сатуу баасы, сом |
| 20203 | 12 967.60 | 63 468 482.92 |
| 20204 | 12 458.70 | 60 977 654.23 |
| 20205 | 12 610.90 | 61 722 680.24 |
| 20206 | 13 076.60 | 64 001 905.72 |
| 20207 | 12 033.50 | 58 896 635.51 |
Алтын куймаларын кантип жана кайсы жерден алса болот?
- Жеке адамдарга жана юридикалык жактарга (алтын өндүрүү жана иштеп чыгуу ишканаларын эске албаганда) аффинаждалган алтын куймаларын сатуу, акча каражаттарын УБнын эсебине которуу аркылуу анын борбордук жүгүртүү касса тобу тарабынан нак эмес формада жумуш күндөрү саат 9:00дөн 15:00гө чейин Бишкек шаары, Yмөталиев көчөсү 101 дарегинде ишке ашырылат (тел. 0312 66-91-42, 0312 66-91-41).
- Сатып алуучу акча каражаттарын УБнын эсебине которгонго чейин аффинаждалган алтын куйманын номерин 0312 66-91-42 телефону аркылуу маалымдоого тийиш.
- Сатуу баасы УБ тарабынан ар бир аффинаждалган алтын куймага өзүнчө белгиленет жана ал күнүмдүк негизде регулятордун расмий интернет-сайтында жарыяланып турат.
- УБ аффинаждалган алтын куймаларын кайра сатып албайт.
- УБ күнүнө 5 (беш) куймадан ашпаган санда аффинаждалган алтын куймаларын сатууну ишке ашырат.
- Аффинаждалган алтын куймалары УБнын эсебине акча каражаттары түшкөндөн кийин ошол эле күнү саат 15:00дөн кечиктирилбестен берилет.
УБ аффинаждалган алтын куймаларын сатууну чектеши мүмкүн.
Сатып алуу тууралуу толук маалыматты Улуттук банктын расмий сайтынан алууга болот.
