Ош мэриясы Ак-Буура дарыясынын жээгин көрктөндүрүп жаткан компанияга 132 млн сом карыз
Ош шаардык мэриясы Ак-Буура дарыясынын жээгин көрктөндүрүү жана жашылдандыруу иштери боюнча курулушту аткарып жаткан компанияга 132 млн сом карыз. Бул тууралуу жергиликтүү t-media.kg маалымат порталы жазды.
Айтылган маалыматка ылайык, жергиликтүү бийлик ал үчүн республикалык бюджеттен 100 млн сом каражат сурап жатат.
Ак-Буура дарыясын жээгин көрктөндүрүү иши 2020-жылы пандемия учурунда башталган. Ошол убакта курулуш мурдагы мэр Таалайбек Сарыбашовдун жеке демилгеси деп айтылган.
Көрктөндүрүү иштеринин биринчи этабына 120 млн сом бөлүнгөн. Бул каражаттын эсебинен курулуштун 35-40%ы гана аяктаган. Долбоордун сметалык баасы 250 млн сом болгон. Эми Ош мэриясы калган каражатты төлөө үчүн республикалык бюджеттен акча сурап жатат. Эгер каражат бөлүнсө курулуш компанияга төлөп берет.
Жакында болсо мэрия Ак-Буура дарыясын көрктөндүрүүнүн экинчи этабын баштоо алдында турат. Ал үчүн Дүйнөлүк банктан каражат сурап жатат.
Дарыянын жээгин көрктөндүрүү долбоорун тендерден «Капитал Курулуш» ЖЧКсы уткан. Компания расмий түрдө ошол учурда Кыялбек Мадишов, Канатбек Кадаев жана Баялы Апсаттаров атуу үч адамга катталган. Апсаттаров муну менен эле кошо ишкер «Кыргыз Каганат» ЖЧКСынын Оштогу филиалынын жетекчиси. Анын негиздөөчүсү «Кыргыз Каганат» ЖЧКсы.
Ак-Буурадагы ири курулуш эки жыл аралыгында ишке ашырыла турган болгон. Анын жалпы баасы 251 млн 893 миң 814 сом. Бул Ош шаарынын бюджетинин төрттөн бир бөлүгү деп айтылат маалыматта.
