Медициналык камсыздандырууда ачык-айкындуулук күчөтүлөт
Садыр Жапаров “Кыргыз Республикасында жарандарды медициналык камсыздандыруу жөнүндө” мыйзамга өзгөртүүлөрдү киргизүү тууралуу мыйзамга кол койду.
Мыйзам 2026-жылдын 22-январында Кыргыз Республикасынын Жогорку Кеңеши тарабынан кабыл алынган.
Документ медициналык камсыздандыруу тутумунда камсыздандырылган жарандардын саламаттык сактоо кызмат көрсөтүүчүлөрүнөн толук жана так маалымат алуу укугун камсыз кылууга багытталган. Ошондой эле Мамлекеттик кепилдиктер программасынын алкагында көрсөтүлүүчү медициналык жардамдын жеткиликтүүлүгүн жана ачык-айкындуулугун жогорулатуу максатын көздөйт.
Мыйзамдын 13-статьясындагы өзгөртүүлөргө ылайык, камсыздандырылган жарандар милдеттүү медициналык камсыздандыруу боюнча медициналык, фармацевтикалык, алдын алуучу жана реабилитациялык кызматтарды алууга укуктуу. Мындан тышкары, алар көрсөтүлүүчү кызматтардын түрү, сапаты жана шарттары тууралуу толук маалымат ала алышат.
Ошондой эле медициналык камсыздандыруу тутумундагы кызмат көрсөтүүчүлөрдүн милдеттери кеңейтилди. Алар жарандарга көрсөтүлгөн медициналык жардам тууралуу жекелештирилген эсеп жүргүзүүгө, кызматтардын тизмеси жана сапаты жөнүндө маалыматты көрүнүктүү жерге жайгаштырууга жана иштөө режими боюнча толук маалымат берүүгө милдеттендирилди.
