Бакыт Төрөбаев "Тойбосс" ишканасынын өндүрүшү менен таанышты
Бүгүн Бишкек шаарында Суу ресурстары, айыл чарба жана кайра иштетүү өнөр жайы министри Бакыт Төрөбаев Тойбосс эт продукцияларын өндүрүүчү ишканасына барып, анын өндүрүштүк ишмердүүлүгү менен таанышты. Бул тууралуу ведомстводон билдиришти.
Иш сапардын жүрүшүндө өндүрүш процесси, сапатты көзөмөлдөө системасы жана продукцияны кайра иштетүү мүмкүнчүлүктөрү каралды. Компания халал стандарттарына ылайык сертификацияланган эт азыктарын өндүргөн алдыңкы ишканалардын бири болуп саналат.
Ишкананын негизги өндүрүшү Чүй облусунда жайгашкан. Продукциялары өлкө аймагындагы фирмалык соода түйүндөрүндө жана супермаркеттерде сатылып, экспортко да чыгарылат.
"Тойбосс" халал талаптарына жооп берген колбаса жана сосиска өндүрүү, эт деликатестерин кайра иштетүү багытында иш алып барат. Өндүрүш Halal, ISO 22000:2018, FSSC 22000 жана HACCP эл аралык стандарттарына ылайык жүргүзүлөт.
Иш сапардын алкагында министр ата мекендик өндүрүштү колдоо, кайра иштетүү тармагын кеңейтүү жана аймактардагы ишканалардын потенциалын жогорулатуу зарылдыгын белгиледи.
