Улуттук банк Казакстандын PayDala төлөм операторуна лицензия берди

Улуттук банк Казакстандын PayDala төлөм операторуна лицензия берди. Бул тууралуу регулятордун басма сөз кызматы билдирди.

Улуттук банк Башкармасынын «Төлөм уюмдарынын жана төлөм системаларынын операторлорунун ишин лицензиялоо жөнүндө» жобонун талаптарына ылайык, «ПэйДала» ЖЧКга 2022-жылдын 15-февралында төмөнкү лицензиялар берилди: 

• үчүнчү жактардын төлөмдөрү жана эсептешүүлөрү боюнча финансылык маалыматтарды кабыл алуу, иштеп чыгуу (процессинг, клиринг) жана төлөм системасынын, ошол процессинг, клиринг борборунун катышуучуларына берүү боюнча кызматтарды сунуштоо ишин жүзөгө ашыруу укугуна 2022-жылдын 15-февралындагы № 2029150222 лицензия

• өз иш натыйжасы болуп саналбаган товарлар жана кызмат көрсөтүүлөр үчүн төлөмдөрдү жана эсептешүүлөрдү үчүнчү жактардын пайдасына маалымат технологияларына жана электрондук каражаттарга, ошондой эле төлөмдөрдү өткөрүү ыкмаларына негизделген төлөм системалары аркылуу кабыл алуу жана өткөрүү боюнча кызматтарды сунуштоо ишин жүзөгө ашыруу укугуна 2022-жылдын 15-февралындагы № 3031150222 лицензия. 

«ПэйДала» ЖЧКсы боюнча тиешелүү маалыматтар Улуттук банктын расмий сайтында «Банктын милдеттери»/«Төлөм системасы»/«Төлөм системасынын операторлору жана төлөм уюмдары» бөлүктөрүндө жайгаштырылган төлөм системасынын операторлорунун жана төлөм уюмдарынын лицензияларынын реестрлерине киргизилген. 

Эске салсак, казакстандык PayDala төлөм оператору Кыргызстанда 2021-жылдын 4-июнунда катталган.