Мыйзамдагы өзгөртүүлөр ишкердик климатка терс таасирин тийгизип жатат – ЖИА
ЖИАнын аткаруучу директору Фархад Пакыров журналисттер менен жолугушуусунда бир жылдын ичиндеги мыйзамдардын өзгөрүшү, анын ичиндеги жаңы Салык кодекси ишкердик инвестициялык климатка бир топ терс таасирин тийгизди деген пикирин билдирди.
Пакыров сырттан келген инвестор биринчи кезекте жергиликтүү ишкерлердин абалына маани бере тургандыгын айтты.
«Кыргызстанда инвестициялык климат дегенде чет өлкөлүк ишкерлерди эле инвестор катары көрүп алабыз жана жергиликтүү ишкерлердин абалы кандай деп аларды өзүнчө бөлүп карайбыз. Биз сырттан келген инвесторлорго шарттарды жакшы түзөлү деген менен ички ишкерлердин абалы өтө жакшы эмес. Себеби бул мыйзамдарга келип такалат», – дейт ал.
Пакыров мамлекет тарабынан демилгеленген мыйзамдар ишкерлерге чоң жоготууларды алып келүүдө деген ойдо.
«Экономикага киргизилген өзгөчө кырдаал, курулуштагы үлүш сыяктуу меселелер, ишкерлерге бир топ жоготууларды алып келип жатат. Жергиликтүү ишкерлердин инвестиция тартуу шартына токтолсок, алардын деңгээлин жогору деп айтуу кыйын. Региондордо инвестиция тартуу боюнча эч кандай иштер жүргүзүлбөйт. Мисалы, бир инвестор келип, Баткен, Жалал-Абад боюнча сураса, так жооп бере алышпайт. Мисалы, коңшу мамлекеттерде ар бир региондун инвестициялык картасы, инвестициялык мүмкүнчүлүктөрү тууралуу маалыматтар бар. Көп учурда адистер Бишкек менен эле чектелип калып жатат», – деди ЖИАнын директору.
Ошондой эле Пакыров ишкерлер туруктуулук каалап жатышканын, өзгөрүп жаткан мыйзамдар терс таасирин тийгизип жатканын кошумчалады.
«Учурда ишкерлер көбүрөөк туруктуулук каалап жатышат. Себеби бир жылдын ичинде эле өзгөртүлгөн Кылмыш кодекстери, Салык кодекстери сыяктуу бир топ чоң документтер ортого чыкты. Бул да күтпөгөн жерден ишкердик инвестициялык климатка бир топ терс таасирин тийгизип койду», – деди ал.
