Brent маркасындагы мунайдын баррели 111 долларга жетти
Brent маркасындагы мунайдын баасы европалык рынокто 3% өсүп, бир баррели 111 долларга жетти. Кара май 7 күн катары менен кымбаттап келатат, ошол эле кезде Азиянын финансы рынокторунда 28-апрелде акциялар арзандады.
Бул Америка менен Ирандын сүйлөшүүлөрүнөн майнап чыкпай, Ормуз кысыгынын жабылышынын экономикалык кесепеттерине байланышкан тынчсыздануу өлкөлөрдүн борбордук банктары саясатын өзгөртүшү мүмкүн деген божомолду бекемдеди.
Ошол жаңы саясатка ылайык, инфляцияга туруштук берүү үчүн үстөк пайызды көтөрүү каралууда.
Ормуз кысыгынан дүйнөдөгү мунай менен газдын дээрлик 20%ы ташылат.
АКШ менен Израил чабуул баштаган 28-февралда Иран кысыкты кемелер менен мунай танкерлери үчүн иш жүзүндө жаап салган. Ок атышууну токтотуу макулдашуусунан кийин, 17-апрелде ачып, көп өтпөй кайра жапкан. Анын алдында АКШ менен Ирандын сүйлөшүүлөрү майнапсыз аяктаганда америкалык аскерлер ирандык портторду бөгөттөгөн.
Мунун айынан пайда болгон глобалдык кризис өзгөчө Азиянын өлкөлөрүндө сезилүүдө.
