Ысык-Көл айланма жолунун курулушу боюнча кредиттик макулдашуу ратификацияланды
Президент Садыр Жапаров Кувейт араб экономикалык өнүктүрүү фондунун ортосунда Ысык-Көл айланма автомобиль жолунун (Корумду-Балбай участогу) долбоору боюнча кредиттик макулдашууну ратификациялоого кол койду.
Мыйзам Жогорку Кеңеш тарабынан 2022-жылдын 2-февралында кабыл алынган. Эскерте кетсек, Ысык-Көлдөгү 80 чакырымдык велосипед жолу да ушул долбоордун алкагында курулаары буга чейин айтылган болчу.
Макулдашуу менен Балыкчы — Каракол — Балыкчы автожолунун (Корумду а. — Балбай а.) 104 — 184.5 км тилкесин реконструкциялоо каралат.
Долбоор төмөнкүлөрдү камсыздайт:
- Ысык-Көлдүн курорттук аймагынын республиканын облустары, ошондой эле Казакстан жана КЭР менен жол байланышын жакшыртууну
- ички жана эл аралык туризмди мындан ары өнүктүрүү үчүн Ысык-Көл шакекчесинин жол жээгиндеги инфраструктурасын жакшыртууну
- өнөр жай өндүрүшүнүн жана айыл чарбасынын өнүгүүсү жана өсүшүн
- Ысык-Көл шакегин Казакстандын жана Россиянын жолдору менен байланыштырууну.
Реконструкциялоо иштеринин жүрүшүндө аялдамаларды, арыктарды орнотуу, жарыктандыруучу лампаларды орнотуу, көпүрөлөрдү реконструкциялоо жана кеңейтүү, веложол жана тротуарларды куруу жана башкалар аркылуу жолду жабдуу каралган.
Жолдун техникалык абалын жакшыртуу менен төмөнкүлөргө жетишүүгө болот:
- товарлардын жана кызмат көрсөтүүлөрдүн, анын ичинде билим берүү жана саламаттыкты сактоо кызматтарынын аймактык рынокторуна жеткиликтүүлүктүн кеңейиши
- жолдо жүрүү убактысы кыскарат
- транспорттук каттам жана мобилдүүлүк жакшырат
- Ысык-Көл жана Түп райондорунун Темировка, Григорьевка, Кожояр, Семеновка, Ананьево, Жаркымбаев, Чоң-Өрүктү, Орто-Өрүктү, Ой-Тал, Ой-Булак, Кутурга, Фрунзе, Ак-Булуң, Күрмөнтү, Балбай Баатыр айылдарынын жол жээгиндеги инфраструктурасы (жаңы тамактануу пункттары, май куюучу станциялары, техникалык тейлөө станциялары ж. б.) жакшырат.
Мындан тышкары, курулуш мезгилинде облустун Ысык-Көл жана Түп райондорунун жергиликтүү калкы үчүн жумуш орундары түзүлүп, жол жээгиндеги инфраструктура жабдылгандан кийин туруктуу жумуш орундарын түзүүгө өбөлгө түзүлөт.
