Акылбек Жапаров Макроэкономикалык жана инвестициялык саясат боюнча координациялык кеңешти жетектеди
Министрлер Кабинети кезектеги кенешмесинде Министрлер кабинетине караштуу Макроэкономикалык жана инвестициялык саясат боюнча координациялык кеңеш жөнүндө чечимди жактырганын кабинеттин маалымат кызматы кабарлады.
Ага ылайык, координациялык кеңешти Министрлер кабинетинин төрагасы Акылбек Жапаров жетектейт.
Белгилесек, кеңештин негизги максаты макроэкономикалык жана инвестициялык саясатты иштеп чыгуу жана ишке ашыруу боюнча координацияланган чечимдерди кабыл алуу жолу аркылуу КРнын экономикасын стабилдештирүү жана туруктуу экономикалык өнүгүүсүнө жетишүү.
«Белгилүү болгондой, Министрлер кабинетинин алдына чоң милдеттер коюлган. Биринчи кезекте, бул билим берүү, саламаттык сактоо, маданият жана социалдык коргоо тармагынын кызматкерлеринин эмгек акысын олуттуу түрдө жогорулатуу боюнча президенттин тапшырмасын аткаруу болуп саналат. Мындан тышкары, экономикалык чөйрөдө алдыдагы реформаларды жүргүзүү, азык-түлүк коопсуздугун камсыздоо, өнөр жай жана инвестициялык долбоорлорду ишке киргизүү боюнча иштер жүрүп жатат. Мамлекеттик башкаруу тутумунда натыйжалуулук, чечимдердин сапаттуу жана ыкчам кабыл алынышы талап кылынат», – деди Акылбек Жапаров.
Ошондой эле Министрлер кабинети чечим кабыл алып, ага ылайык, Ысык-Көл облусунун Тамчы айылындагы өткөрүү пункту, бажы көзөмөлү жана «Ысык-Көл» аэропорту авиакомпанияларга жана жүргүнчүлөргө ыңгайлуу шарттарды түзүү максатында күнү-түнү иштей турган болду.
