Казакстандын мурдагы УКК башчысы Карим Масимовдун самурай кылычы 3,4 млн теңгеден ашык суммага сатылды
Мурдагы УКК башчысынын хан сарайынан алынган буюмдарды сатуу уланып жатат. Астанада өткөн электрондук аукциондо Масимовдун үйүн тинтүү учурунда алынган самурай кылычы жана булгаары кур сатылды деп билдирет Orda.kz. Баштапкы баасы 461 миң теңге болгон кылыч 3 миллион 413 миң 825 теңгеге сатылды.
Кылыч болоттон жасалган жана кыны кара түстө, сабы металлдан болуп, геометриялык оймо-чиймелер менен кооздолгон. Соода классикалык тартипте — бааны жогорулатуу жолу менен өткөн.
Кылыч менен кошо улуттук оймо-чийме түшүрүлгөн булгаары кур да сатылды. Анын баштапкы баасы 183 миң 750 теңге болсо, акыркы баасы 524 миң 261 теңгеге жетти.
Самурай кылычын кыны менен буга чейин да сатууга аракет кылышкан, бирок мурунку аукциондун жыйынтыгы жокко чыгарылган. Кийин бул буюм кайрадан сатылуучу мүлктөрдүн тизмесине киргизилген.
Масимовдун Астанадагы хан сарайын тинтүү учурунда курал-жарактардын ири коллекциясы, антиквариат, кымбат сааттар, сүрөттөр, алтын куймалары жана ири өлчөмдөгү накталай акча табылган. Аянты дээрлик 2,9 миң чарчы метр болгон үйдө бассейн, сауна, диско-бар, караоке жана өзүнчө сахна да болгон. Ошондой эле миллиондогон доллар накталай акча жана бизнес-класстагы 11 автоунаа табылган. Хан сарай жер тилкеси менен кошо 1,5 миллиард теңгеден ашык бааланган.
