Россияда эмгек мигранттары үчүн кошумча төлөмдөр киргизилет
Россия бийлиги визасыз режимдеги КМШ мамлекеттеринен келген эмгек мигранттарына карата эрежелерди катаалдаштырууну даярдап жатканын Коммерсантъ басылмасы жазды.
Финансы министрлигинин мыйзам долбооруна ылайык, 2027-жылдан тарта мигранттар патентти өздөрү үчүн гана эмес, жашы жете элек балдары жана башка багуусундагы адамдар үчүн да төлөөгө милдеттүү болушат. Алар үчүн төлөм негизги сумманын 50%ы өлчөмүндө болот.
Балдары 18 жашка толгондо, алар өз алдынча патент алууга же өлкөдө жашоого башка мыйзамдуу негиз жок болсо Россиядан чыгып кетүүгө тийиш.
Патент — бул жеке киреше салыгы боюнча ай сайын төлөнүүчү туруктуу аванстык төлөм. Азыр базалык ставкасы 1,2 миң рубль. Дефлятор коэффициентин жана аймактык коэффициентти эске алганда, сумма ар аймакта ар башка: Чеченстанда 3,4 миң рублден, Краснодарский крайында 27,3 миң рублге чейин жетет. Москва шаарында айлык төлөм болжол менен 10 миң рублди түзөт.
Өзгөртүүлөр патент төлөөгө милдеттүү болгон мигранттардын чөйрөсүн кеңейтет. Анын ичинде жеке адамдарга — үй-бүлөлүк же тиричилик муктаждыктары үчүн иштегендер да кирет. Мындан тышкары, кирешелерге көзөмөл күчөтүлөт: Салык кызматы патент ээлеринин "ак" кирешеси аймактагы жашоо минимумунан төмөн болбошун текшерет.
