2021-жылы кен иштетүүдөн бюджетке 23 млрд сом түшкөн
2021-жылы кен иштетүүдөн бюджетке 23 млрд сом түшкөн. Бул тууралуу президент Садыр Жапаров кечээ, 3-апрелде, тоо-кен тармагынын кызматкерлерин КРнын Геологунун күнү менен куттуктоо сөзүндө билдирди.
Куттуктоо сөзүндө Жапаров учурда ата мекендик тоо-кен — геология комплексин капиталды көп талап кылган ишканалар түзөөрүн жана алар 2021-жылдын жыйынтыгы боюнча өлкө бюджетине жалпы салыктык жана салыктык эмес төлөмдөр менен кен иштетүүдөгү социалдык төлөмдөрдөн 23 млрд сом төлөшкөнүн айтты.
Ошону менен бирге ал чакан жана орто бизнес боюнча долбоорлорду каржылоо багытында рекультивация фонддорунун каражаттары мамлекеттик банктарда топтоло баштаганын, кен чыккан жерлерди иштетүүгө, ишке киргизүүгө инвестиция тартууга түрткү берүү максатында лицензияларды кармоо үчүн ставкалар өзгөртүлгөнүн кошумчалады.
«Бүгүнкү күндө дүйнөлүк тенденциялар геология тармагын өнүктүрүү жаатында башкаруу, заманбап технологияларды колдонуу жана өлкө аймагында масштабдуу, системалуу изилдөөлөрдү жүргүзүү сыяктуу иш-аракеттерде жаңы ыкмаларды киргизүүгө түрткү берет. Мындай заманбап ыкмаларды адистерибиз ыкчам өздөштүрүп, колдонууга тез арада киргизерине бекем ишенем.
Ата мекендик геологияны өнүктүрүү үчүн салым кошкон, тажрыйбасы мол ардагерлерге да өзгөчө ыраазылык билдирем!» – деди президент.
