Кыргызстан канадалык Centerra Gold компаниясы менен келишимге бүгүн түз эфирде кол коет
Бүгүн, 4-апрелде Кыргызстан канадалык Centerra Gold компаниясы менен өз ара дооматтарды жөнгө салуу боюнча келишимге кол коет. Бул тууралуу президент Садыр Жапаров социалдык кызматкерлердин республикалык жыйынында билдирди.
Президенттин айтымында, кол коюу кечки саат 18:30да түз эфирде көрсөтүлөт.
«Тынч, эч кандай соттошуусу жок ажырашып жатабыз. Биздин пайдабызга чечилип жатат. Кумтөр жана андан башка 30дан ашуун алтын кен чыккан бош жаткан жерлерибиз бар. Бардыгын мамлекеттин менчиги катары өзүбүз иштетебиз деп, «Көчмөндөр мурасы» атуу холдинг түзгөнбүз, ошол кендердин бардыгын өзүбүз ачабыз. Кумтөр сыяктуу алтын кендерди өзүбүз иштеткен үчүн, ишенген үчүн айлык акыларды көтөрүп жатабыз», — деди Жапаров.
«Центерра Голд» жөнгө салуу келишиминде төмөнкү негизги шарттар камтылат деп күтүүдө:
- «Центерра Голд» «Кыргызалтын» ААКга таандык «Центерра Голддун» 26.1%га жакын жөнөкөй акцияларын алат ( КР мамлекеттик үлүшү 100%). Акцияларды алгандан кийин Centerra Gold аларды жокко чыгарат.
- Кыргызстан «Центерра Голддун» Кыргызстандагы эки туунду компаниясы («Кумтөр Голд Компани» жана «Кумтөр Оперейтинг Компани») үчүн толук жоопкерчиликти өзүнө алат.
- «Центерра Голд» Кыргызстанга 2021-жылдын дивиденддерин төлөп берет, себеби, «Кыргызалтын» ААК кенди чыгаруунун натыйжасында албай калган.
- Centerra Gold анын Кыргызстандагы эки туунду компаниясынын ортосундагы компаниялар аралык баланстарды жөнгө салууга байланыштуу «белгилүү бир каржылык сый акыларды» төлөп берет.
- «Кыргызалтын» ААКтын эки талапкери «Центерра Голд» директорлор кеңешинин курамынан чыгат.
- Тараптар бардык дооматтарын толугу менен жана биротоло алып салышат жана жоопкерчиликти мойнуна албастан бардык юрисдикциялардагы соттук териштирүүлөрдү токтотушат.
