Кыргызстан өткөн жылы 1 млн тонна көмүрдү сыртка экспорттоп, кайра Казакстандан 650 миң тонна көмүр сатып алган
Кыргызстан өткөн жылы 1 млн тонна көмүрдү сыртка экспорттоп, кайра Казакстандан 650 миң тонна көмүр сатып алган. Бул тууралуу Депутат Жеңишбек Токторбаев бүгүн, 6-апрелдеги Жогорку Кеңештин жыйынында билдирди.
Депутаттын айтымында, 2021-жылы республика боюнча 3 млн тоннага жакын көмүр казылып алынып, анын ичинен 1 млн тоннадан ашыгы сыртка экспорттолгон. Ошондой эле көмүр казып алуучу ишканалар бюджетке болгону 600 млн сом чегеришкен.
Токторбаев 2021-2022-жылдары күз-кыш мезгилдеринде Бишкек ЖЭБге кайрадан 650 миң тонна көмүрдү Казакстандан импорттолгонун айтты.
«Анын тоннасын 4 миң сомдон сатып алганбыз. Жалпы 2.6 млрд сомду түзөт, бул 30 млн доллардын тегерегинде болот. Эгерде Бишкек ЖЭБди көмүр менен өзүбүз камсыз кылсак, 30 млн долларга 2 чоң экскаватор 650 даана жүк ташуучу машина сатып алсак болчудай», – деди ал.
