Мадумаров менен Масалиев мыйзам долбооруна добуш берүүгө дагы бөгөт коюшту – бул жолу мүлктү легалдаштыруу боюнча
Бүгүн, 29-июнда, Жогорку Кеңештин “Бүтүн Кыргызстан” фракциясынын депутаттары Адахан Мадумаров менен Исхак Масалиев жеке адамдардын мүлкүнө мунапыс берүү боюнча мыйзам долбооруна добуш берүүгө бөгөт коюшту. Долбоор капиталды, анын ичинде мыйзамсыз жыйналган мүлктү легалдаштырууну камтыйт.
Kaktus.media билдиргендей, спикер Талант Мамытов мыйзам долбоорун бир нече жолу добуш берүүгө койгон, бирок Мадумаров менен Масалиев добуштарын берген эмес. Аларга бир-эки жолу Эльвира Сурабалдиева менен Динара Ашимова кошулган.
Масалиев мыйзам долбоорлоруна каалаган учурда добуш берүү болбойт деп айтты: бул процедуранын белгилүү бир мөөнөтү бар.
«Талкуулоо учурунда министрлер кабинетинин башчысы коррупция беренелердин тизмесине кирбейт деп айткан, ал эми мыйзам долбоорунда тескерисинче жазылган. Адам өлтүргөн, коррупция, шалаакылык, кордук кылган адамдар акталып чыгат. Ошондуктан мен добуш бербейм. Бул менин каршылыгым», – деди депутат.
Президенттик аппараттын парламенттеги өкүлү Алмасбек Абытов мыйзам долбоорун добуш берүү тизмесинен алып салууну суранды.
Эске салсак, өткөн аптада да Кыргызстанда казино ачуу боюнча мыйзам долбоорунун кабыл алынышына Мадумаров менен Масалиев кошулган алты депутат бөгөт коюшкан.
