“Мен чемпион” республикалык кышкы жарышты Караколдук өспүрүмдөр жеңип алышты
Каракол шаарындагы тоо лыжа базасында 2008–2015-жылдары туулган өспүрүмдөр арасында “Мен чемпион” аталышындагы республикалык кышкы спорттук оюндардын тоо лыжа боюнча мелдештери өткөрүлдү.
Дене тарбия жана спорт мамлекеттик агенттигинин маалыматына ылайык, “Мен чемпион” оюндары балдар-өспүрүмдөр арасында спортту өнүктүрүүгө, кышкы спорт түрлөрүн жайылтууга жана аймактар арасында атаандаштыкты күчөтүүгө багытталган.
Аталган мелдешке жалпы 110 спортчу катышып, алты команда байге үчүн күч сынашып, анын жалпы байге фонду 600 000 сомду түздү. Командалар Нарын, Чүй, Ысык-Көл облустарынан, ошондой эле Жалал-Абад облусунун Тогуз-Торо жана Чаткал райондорунан келишти.
Үч күнгө созулган таймаштын жыйынтыгында жалпы командалык эсепте “Каракол №1” командасы эң жогорку упайды топтоп - 220 000 сом өлчөмүндөгү баш байгеге ээ болду.
Экинчи орунду Нарын шаарынын “Ала-Тоо” тобу ээлеп, 170 000 сомго татыды.
Үчүнчү орун Ысык-Ата районунун Спорттук оюн жана кышкы түрлөрү боюнча өспүрүмдөрүнө ыйгарылып, команда 110 000 сом утуп алды.
Төртүнчү орунду Каракол шаарынын (50 000 сом), ал эми бешинчи орунду Тогуз-Торо районунан өспүрумдөрү (50 000 сом) багындырышты.
