«Кыргызкөмүр» МИ бааларды кымбаттатып, мамлекетке 127 млн сом зыян келтирген
Бишкек шаарынын прокуратурасы тарабынан Энергетика министрлигине караштуу «Кыргызкөмүр» мамлекеттик ишканасында текшерүү жүргүзүлдү. Бул тууралуу прокуратуранын маалымат кызматы билдирди.
Текшерүүнүн жүрүшүндө, «Кыргызкөмүр» МИнин жетекчилиги жана тийиштүү жооптуу кызматкерлери кызмат абалдарынан кыянаттык менен пайдаланышып, мамлекеттин кызыкчылыгына карабастан, мыйзамсыз түрдө, өз ара аффилирленген «Ж» жана «И» ЖЧКлары менен «Кара-Кече» көмүр кенинен Балыкчы шаарына чейин 200 миң тонналык көмүрдү ташып жеткизүү үчүн кызматтарды сатып алуу боюнча атайын бекитилген баанын өлчөмүнөн эки эсеге жакын кымбат баада келишим түзүшкөндүгү аныкталган.
Натыйжада, мамлекетке 127 млн 185 миң сомдук зыян келтирилген.
