Бишкекте экологиялык заводдо абанын булганышы талкууланды
Күн мурун Бишкек шаарындагы санитардык полигондо жайгашкан катуу тиричилик калдыктарын утилдештирүү аркылуу электр энергиясын өндүрүүчү экологиялык технологиялык заводдо атмосфералык абанын сапатын жакшыртуу маселелерине арналган коомдук угуу болуп өттү. Бул тууралуу муниципалитеттен билдиришти.
Иш-чарага Айбек Джунушалиев, Бишкек шаардык кеңешинин төрагасы Бекжан Үсөналиев, депутаттар, Экологиялык кеңештин мүчөлөрү, эксперттер, мамлекеттик органдардын өкүлдөрү, ЖМК жана шаар тургундары катышты. Жалпы 150дөн ашуун адам болду.
Мэр завод боюнча экскурсия өткөрүп, объект Бишкектеги экологиялык абалды жакшыртууда маанилүү роль ойной турганын белгиледи.
Маалыматка ылайык, Экологиялык кеңештин сунуштары ишке ашырылууда. 2025-жылы 18 миң көчөт отургузулса, 2026-жылы бул көрсөткүч 50 миңге жеткирилди. Учурда көчөттөр жеткирилип, отургузууга даярдоо иштери жүрүүдө.
Угуу учурунда ыш жана абанын булганышы негизги маселе катары көтөрүлүп, катышуучулардын суроолору жана сунуштары каттоого алынды.
Иш-чара Бишкек шаарынын мэриясы тарабынан Өнүктүрүү саясаты институту менен биргеликте уюштурулду.
