2023-жылдан баштап «социалдык контракт» бүткүл өлкөдө ишке кирет - аялуу категориядагы бүлөлөр 100 миң сомдон алышат
Кийинки жылдан баштап социалдык контракт бүткүл өлкө боюнча ишке киргизилет деп пландалууда. Бул тууралуу Эмгек министри Кудайберген Базарбаев Алай районунун тургундарына социалдык контракт тууралуу айтып берип жатып билдирди.
Белгилей кетсек, “Социалдык контракт” долбоорунун алкагында пилоттук режимде Кадамжай районунда, Баткен облусунда (50) жана Нарын облусунун Жумгал районунда (50) социалдык жактан аялуу категориясына кирген 100 үй-бүлөгө 100 миң сом өлчөмүндө гранттык каражаттар акысыз берилген.
2022-жылдын февраль айынан баштап долбоордун катышуучулары киреше алып келүүчү бизнес-пландарды ийгиликтүү ишке ашырышкан.
“Жакында эле социалдык келишимдин негизинде социалдык контракт көрсөтүү жөнүндө жобо бекитилди. Кийинки жылдан баштап социалдык контракт бүткүл өлкө боюнча ишке киргизилет деп пландалууда. Биз”үй-бүлөгө көмөк” алычуулардын арасында 2800 үй бүлөгө 100 миң сомдон бизнес баштаганга таратабыз”, – деди Базарбаев.
