Кыргызстан 17 түр айыл чарба продукциясын экспорттой алат
Айыл чарба министрлиги маалымдагандай, учурда Кытай менен айыл чарба продукциясынын 15 түрүн жеткирүү боюнча протоколдорго кол коюлган. Жакын арада жаңы документтерге кол коюу аркылуу бул тизмени кеңейтүү пландалып жатат.
Жалпысынан бүгүнкү күндө Кыргызстан айыл чарба продукциясынын 17 түрү боюнча экспорттук мүмкүнчүлүккө ээ. Кыргызстандын айыл чарба продукциясы бир катар мамлекеттерге экспорттолот:
- Евразия экономикалык биримдиги мамлекеттерине — 462 ишкана
- Кытайга — 37 ишкана
- Өзбекстанга — 53 ишкана
- Түркияга — 12 ишкана
- Улуу Британияга — 68 ишкана
Маалыматка ылайык, өлкөнүн жалпы экспортунун болжол менен 75%ын айыл чарба продукциясы түзөт.
Мындан тышкары, жүргүзүлгөн иштердин жыйынтыгында Кыргызстан ата мекендик балды Европа Биримдигинин рыногунда сатууга уруксат алды.
Министрликтин маалыматына караганда, буурчак өсүмдүктөрүнүн экспортун көбөйтүү үчүн продукциянын сапатын жогорулатууга өзгөчө көңүл буруу зарыл. Азыркы учурда тармакта продукцияны кошулмалардан тазалоо, сорттоо жана экспорттук стандарттарга жеткирүү боюнча системалуу көйгөйлөр сакталууда. Айрым өлкөлөрдө бул процесстер мамлекеттик деңгээлде уюштурулуп, экономикалык жактан пайдалуу болуп саналат, ал эми Кыргызстанда бул багыт жетиштүү өнүккөн эмес.
Ошондой эле буурчак өсүмдүктөрү негизинен малга тоют катары, ошондой эле мектептердин жана башка мекемелердин керектөөлөрү үчүн колдонулуп жатканы алардын экспорттук мүмкүнчүлүгүн азайтып жатканы белгиленет. Мындан сырткары, тышкы рынокко чыгууда транспорттук чыгымдарды эске алуу жана продукциянын атаандаштыкка жөндөмдүү баасын сактоо зарыл.
Ушуга байланыштуу министрлик тармакты комплекстүү жаңылоонун зарылдыгын баса белгилейт. Бул — өсүмдүк өстүрүүнү өнүктүрүү, сортторду туура тандоо, түшүмдүүлүктү жогорулатуу, өндүрүүчүлөрдүн кооперациясын кеңейтүү, биржа аянтчаларына чыгуу жана логистикалык чыгымдарды кылдат эсептөө сыяктуу чараларды камтыйт.
