Балыкчы - Барскоон жолунун 10 чакырымдан ашык бөлүгүнө асфальт төшөлдү
Бүгүнкү күнгө карата «Кыргызалтын» ААКтын каржылоосу менен оңдолуп жаткан Балыкчы – Барскоон жолунун 10 чакырымдан ашык бөлүгүнө асфальт төшөлдү. Бул тууралуу Кыргызстандын жол куруучу ишканалар ассоциациясынын басма сөз кызматы билдирди.
Жалпы узундугу 141.64 км түзгөн Балыкчы – Барскоон жолун реконструкциялоону башкы подрядчы катары Жол куруучу ишканалар ассоциациясы ишке ашырууда.
Уюм жолду оңдоо долбоору эки фазага бөлүнөрүн белгиледи:
- I фазага Балыкчы шаарынан Ак-Сай айылына чейинки узундугу 71 км (0дөн 71-километрге чейин) тилке кирет – аны башкы подрядчы «Кыргыз Жол Курулуш» ЖЧКсы ишке ашырып жатат.
- II фазага Ак-Сай айылынан Барскоон айылына чейинки узундугу 70.64 км (71ден 141.64-километрге чейин) тилке кирет – аны «Арек Строй» жол куруу ишканасы ишке ашырууда.
Бүгүнкү күнгө карата жолдун 10 чакырымдан ашыгы асфальтталып, 25 чакырымында жер иштери 100%га бүтүп, жасалма курулмалар орнотулуп жатканын Кыргызстандын жол куруучу ишканалар ассоциациясы билдирди.
Жолдун 29-чакырымында эки жаңы асфальт-бетон заводу жана майдалоочу жана электөөчү комплекстер орнотулду.
Долбоордо жалпысынан 1000ден ашуун адам иштеп жатат, алардын көбү Тоң жана Жети-Өгүз райондорунун жергиликтүү тургундары.
2021-жылдын 1-августунда башталган долбоордун биринчи этабына 11 ата мекендик компания субподрядчы катары тартылган эле. Алар: «Мостдорстрой» ЖЧК, «Чу прокси» ЖЧК, «Жолчу» ЖАК (Талас), «РюЗ Компани» ЖЧК, «Досинжиниринг» ЖЧК, «Сармат» ЖЧК, «ТрансстройдорСервис» ЖЧК, «Иссык-Куль Дорстрой» ЖЧК, «Билдинг менеджер групп» ЖЧК, «Дили» ЖЧК жана «Жолчу» ЖАК (Чүй).
Бүгүнкү күндө узундугу 46 км долбоордун экинчи этабы башталып, аны ишке ашырууга 12 ата мекендик компания катышууда.
Балыкчы – Барскоон жолу 50 жылдан ашык убакыттан бери оңдолбой келген бөлүгү 2021-жылдын август айынын башында реконструкциялана баштаганын буга чейин Economist.kg маалымдаган.
Долбоор президент Садыр Жапаровдун демилгеси жана тапшырмасы менен ишке ашырылууда. Мамлекет башчысы 2021-жылдын 15-июнунда Кумтөр кени сырттан башкаруу киргизилгенден кийин биринчи жолу барган сапарында ишкананын жумушчулары менен баарлашып жатып, жол Кумтөрдөн түшкөн каражаттын эсебинен оңдолот деп айткан.
Реконструкциялоо иштери аяктагандан кийин бул жол тосмо менен бөлүнгөн төрт тилкелүү жолго айланат.
