Бишкекте мыйзамсыз иштеген реабилитациялык борборлор жабылды

Бишкекте мыйзамсыз иштеген "Хидальго", "Решение" жана "Бишкек-Маяк" реабилитациялык борборлорунун иши токтотулду. Бул тууралуу УКМК билдирди.

Текшерүүдө борборлордун кызматкерлери бейтаптарды электрошокер менен кыйнап, байлап, обочолоп, физикалык жана психологиялык басым көрсөтүп келишкени аныкталды. Ошондой эле бейтаптарга колдонууга тыюу салынган күчтүү психотроптук препараттар табылды.

Соттун чечими менен борборлордун директорлору жана кызматкерлеринин ичинен 7 адам кармалып, камакка алынды. Мындан тышкары, "Бишкек-Маяк" борборунда дарыланып жаткан эки бейтаптын өлүмү катталган.

Азыркы учурда айрым кызматтар тарабынан өлүмдүн бардык жагдайлары иликтенип, зарыл юридикалык чаралар көрүлүүдө.