Мамлекеттик монополия ишке кирди - «Кара-Балта спирт заводу» иштей баштады
«Кара-Балта спирт заводу» мамлекеттик ишканасы президенттин жарлыгына ылайык, үстүбүздөгү жылдын 10-августунан тарта крахмал камтыган сырьенун негизинде (буудай даны) этил спиртин өндүрүүнү баштады. Бул тууралуу минкабдын маалымат кызматы билдирди.
“Учурда ишкана менен алкоголдук жана медициналык продукцияны өндүрүүчүлөрдүн ортосунда этил спиртин жеткирүү боюнча келишимдер түзүлүп, ал ишке ашырылууда”, – деп айтылат билдирүүдө.
Үстүбүздөгү жылдын 1-сентябрына карата 35 632.53 декалитр «Люкс» классындагы спирт өндүрүлгөн. Үстүбүздөгү жылдын башынан бери 67 миң 453.4 декалитр ректификацияланган этил спирти өндүрүлүп, анын 60 миң декалитрден ашуун көлөмү сатылган.
Эскерте кетсек, 2022-жылдын 1-сентябрынан тартып өлкө аймагында этил спиртин өндүрүү, импорттоо, сактоо жана сатууга 100% мамлекеттик монополия киргизилет деген президенттин жарлыгына кол коюлган.
- «Кара-Балта спирт заводу» МИ – этил спиртин өндүрүү боюнча толук жабдылган ишкана. Негизги багыты спирт өндүрүшү болуп саналат. Ишкана курамында крахмал бар сырьену (3, 4, 5-класстагы буудай) да, кант камтыган сырьену да (кызылча патока, чийки кант) кайра иштетүү мүмкүнчүлүгүнө ээ.
