МИК Германиянын KfW өнүктүрүү банкынын конверсияланган карызынан жыл сайын 5 млн евродон алат
Мамлекеттик ипотекалык компания (МИК) турак жайларды каржылоо программасынын II фазасынын алкагында өлкөнүн аймактарын өнүктүрүү үчүн германиялык KfW өнүктүрүү банкынын карызын конверсиялоодон кошумча каражаттардын келишин күтүүдө. Бул тууралуу БШКнын басма сөз кызматы билдирди.
Эскерте кетсек, Economist.kg мурда кабарлагандай, Германия Кыргызстандын 14.9 млн евро карызын кечүүнү чечкен. Бирок бул каражатты жарандарга ипотекалык насыя катарында берүү шартын койгон болчу.
Бүгүнкү күндө МИК каржылоонун I фазасынын аягына чыкты. Тагыраак айтканда, айыл жериндеги жана чакан шаарлардагы (Бишкек жана Ош шаарларынан башка) аз жана орто кирешелүү үй-бүлөлөр үчүн “Жеткиликтүү ипотека” багыты боюнча турак жайды каржылоо программасынын алкагында Германия өкмөтү тарабынан KfW банкы аркылуу берилген каражатты берүүнү аяктады.
Германия койгон шартка ылайык, ипотекалык насыялар Бишкек жана Ош шаарларынын чегинен тышкары жалданып иштеген же ишкерлик кылган бардык категориядагы жарандарга жылдык 8% менен, 15 жылга чейин берилет.
“Келишимге ылайык, биз үч жыл бою республикалык бюджеттен жыл сайын 5 млн евродон МИКке төлөшүбүз керек. МИК октябрь айынан баштап батирлерди жана үйлөрдү сатып алууга каражат бере баштайт. Белгилей кетсек, МИК ансыз деле бүгүнкү күнгө чейин ипотекалык насыяларды берип келген. Бирок бул жарандарга берүү үчүн кошумча каражат болот”, – деди Финансы министринин орун басары Руслан Татиков министрликтин Инстаграмдагы баракчасында түз эфирде маалымат берип жатып.
