Маданият министри "Кыргызфильм" киностудиясындагы оңдоо иштери менен таанышты
Мирбек Мамбеталиев жана анын орун басары Марат Тагаев "Кыргызфильм" киностудиясынын имаратындагы жана ага чектеш аймактагы чарбалык корпустарда жүрүп жаткан оңдоо-калыбына келтирүү иштеринин жүрүшү менен таанышышты.
Иштердин жүрүшү тууралуу Кинематография департаментинин директору Талантбек Төлөбеков жана "Кыргызфильм" киностудиясынын жетекчиси Максат Жумаев маалымат беришти.
Маданият министрлигинин маалыматына ылайык, учурда лифттер калыбына келтирилип, эмеректерди сатып алуу иштери жүргүзүлүүдө. Ошондой эле режиссёрлордун, продюсерлердин, сүрөтчүлөрдүн жана гримёрлордун иш кабинеттеринде оңдоо иштери жүрүп жатат.
Мындан тышкары, кинозалда жана мини-кинопавильондо (эски имаратта) иштер уланууда. Ал жерде оорукана, мектеп, түрмө жайлары, совет доорундагы батирлер жана башка сахналык мейкиндиктердин декорациялары түзүлүп жатат.
Ошондой эле министр "Кыргызтасмасы" мекемесинин ишмердүүлүгүн текшерди.
Кароо жыйынтыгында Мирбек Мамбеталиев Кинематография департаментинин жана карамагындагы мекемелердин жетекчилигине оңдоо иштерин өз мөөнөтүндө жана сапаттуу аяктоону камсыз кылуу, каражаттарды максаттуу пайдаланууга көзөмөлдү күчөтүү, ошондой эле тармактын инфраструктурасын модернизациялоо жана ата мекендик кинематографияны өнүктүрүү үчүн жагымдуу шарттарды түзүү боюнча тапшырмаларды берди.
