Баткен: 136 миң жаран эвакуацияланды, жалпы 775 тонна гумжардам жеткирилди
Бүгүн, 20-сентябрь саат 08:00гө карата маалыматка ылайык, Батккен облусу боюнча 136 770 жаран эвакуацияланып, анын ичинен 3427 жаран убактылуу кабыл алуу жайларга жайгашкан. Бул тууралуу ӨКМнын маалымат кызматы билдирди.
Ош облусунун Чоң-Алай районунун Жекенди айыл аймагынын айылдарынан 5301 жаран эвакуацияланган. Ош шаарындагы билим берүү мекемелеринин жатаканаларында 1890 орун даярдалып, 512 жаран жайгашкан.
“Ошондой эле Баткен облусуна жалпы 775 тонна гумжардам жеткирилген. Анын ичинен 131 тонна КР ӨКМ тарабынан, 478 тонна жардам жарандар тарабынан өз күчү менен жеткирилген.
Учурда кампада 165 тонна гуманитардык жардам турат. Республиканын аймактарынан чогултулган гуманитардык жардамдар 51 оор жүк ташуучу унааларга жүктөлүп Баткен облусунун аймагына жөнөтүлгөн”, – дейт ӨКМ.
Республиканын бардык облус жана шаарларында гуманитардык жардамдарды чогултуу боюнча жалпы 188 пункт уюштурулуп, иштер жүрүп жатат:
- Ош облусунда – 44
- Жалал-Абад облусунда – 12
- Нарын облусунда – 6
- Ысык-Көл облусунда – 69
- Талас облусунда – 43
- Чүй облусунда – 12
- Ош шаарында –1
- Бишкек шаарында – 1.
Эгерде сиз дагы Баткен облусунун жабыр тарткан тургундарына материалдык жардам көрсөтүүнү кааласаңыз, анда Финансы министрлигинин атайын эсебине каражат которсоңуз болот. Ошондой эле тургундарды эвакуациялоо үчүн күйүүчү-майлоочу материалдарды, азык-түлүк, керектүү буюмдарды сатып алып жаткан Улуттук Кызыл Жарым Ай Коомуна акча каражатын которсоңуз болот.
Эгер сиз өзүңүз гуманитардык жардам көрсөткүңүз келсе, керектүү нерселердин жаңыланган тизмесин бул жерден карасаңыз болот. Гуманитардык жардам чогултуу пункттарынын даректерин бул жерден таба аласыз.
Жабыркагандар да донордук канга муктаж. Даректерди жана байланыштарды бул жерден тапса болот.
Эске салсак, 16-сентябрда кыргыз-тажик мамлекеттик чек арасынын бардык периметри боюнча куралдуу кагылышуулар башталып, Баткен облусунун тургундарын эвакуациялоо иштери башталган. КРнын Улуттук коопсуздук боюнча мамлекеттик комитети тажик тарап оор бронтехникаларды, ракеталык системаларды жана авиацияны колдонгону тууралуу маалымат берди. Кыргызстан менен Тажикстандын Улуттук коопсуздук боюнча мамлекеттик комитетинин жетекчилери Камчыбек Ташиев менен Саймумин Ятимов саат 16:00дө ок атышууну токтотууну макулдашышкан. Бирок эки сааттан кийин Тажикстан Республикасынын чек арачылары Кыргызстан тарапка кайрадан ок чыгарышкан.
Бүгүн, 20-сентябрга карата куралдуу кагылышуудан шейит болгондордун саны 59га, жаракат алгандардын саны 183кө жетти.
