Өзбекстан, Кыргызстан, Казакстан жана Тажикстан суу тармагынын иштөө режимин сүйлөшүштү
Ташкент шаарында Өзбекстан, Кыргызстан, Казакстан жана Тажикстандын энергетика жана суу чарба министрлеринин жумушчу жолугушуусу болуп өткөнүн Энергетика министрлигинин басма сөз кызматы билдирди.
Жолугушууга Өзбекстандын энергетика министри Ж. Мирзамахмудов, Өзбекстандын суу чарба министри Ш. Хамраев, Кыргызстандвын энергетика министри Т. Ибраев, Казакстандын энергетика министри Е. Аккенженов, Тажикстандын энергетика жана суу ресурстары министри Д. Джума,
ошондой эле аталган өлкөлөрдүн энергетикалык компанияларынын жетекчилери жана жооптуу адистер каттышышты.
Сүйлөшүүлөрдүн жүрүшүндө достук жана боордош мамлекеттердин президенттери тарабынан акыркы жылдары демилгеленген көп тараптуу кызматташтык бардык багыттар боюнча, айрыкча отун-энергетика тармагында ырааттуу жана натыйжалуу өнүгүп жатканы белгиленди.
Жолугушууда учурдагы күз-кыш мезгилин коопсуз өткөрүү, вегетациялык мезгилде суу-энергетикалык системалардын туруктуу жана үзгүлтүксүз иштешин камсыз кылуу, өз ара кызматташтыкты мындан ары тереңдетүү талкууланган. Жыйынтыгында тараптар тармактардын иштөө режимдеринин графиктерин макулдашышты.
