Үйдөгү 3 млн сомду, алтындарды шыпырып кеткен шылуун кармалды

Бишкек шаарынын Октябрь райондук ички иштер башкармалыгынын кылмыш иликтөө бөлүмүнүн кызматкерлери батир уурулуктарына шектелген жаранды кармашты.

Тергөө кызматына борбор калаанын тургуну Ж.Н. арыз менен кайрылган. Анын айтымында, 2026-жылдын 30-январынан 31-январына караган түнү белгисиз адамдар "Көк-Жар" конушунда жайгашкан үйүнүн пластик терезесин сындырып кирип, 3 млн сом өлчөмүндөгү акча каражатын жана алтын буюмдарын уурдап кетишкен. Андан соң кылмышкерлер из жашырып кетишкен.

Бул факт боюнча Кылмыш-жаза кодексинин 205-беренеси ("Уурулук") менен кылмыш иши козголду.

Ыкчам-иликтөө иш-чараларынын жүрүшүндө буга чейин соттолгон, 1989-жылы туулган С.А. аттуу жаран кармалды. Ал Бишкек ШИИББнин убактылуу кармоочу жайына киргизилди.

Милициянын маалыматына ылайык, шектүүнүн Чүй облусунун аймагында жана борбор калаада жасалган дагы 10 окшош уурулукка тиешеси бар экени аныкталды.

Укук коргоо органдары шектүүнүн аракеттеринен жабыркаган же кандайдыр бир маалыматка ээ болгон жарандарды 0508 019 001, 0707 333 538 же 102 телефондору аркылуу кабарлоого чакырат.