КР жана Тажикстандын УКМКларынын жетекчилери куралдуу жаңжалды жөнгө салуу боюнча протоколго кол коюшту
Кыргызстан менен Тажикстандын чек ара аймактарындагы куралдуу жаңжалды жөнгө салуу жөнүндө протоколго кол коюлду, анда согуштук аракеттерди толук токтотуу, аскерлерди жана аскердик техниканы чыгарып кетүү каралган.
Кыргыз-тажик мамлекеттик чек арасындагы куралдуу чыр-чатакты жөнгө салуу боюнча иш-чаралардын алкагында, министрлер кабинетинин төрагасынын орун басары – УКМКнын төрагасы, генерал-лейтенант Камчыбек Ташиев кечээ, 19-сентябрда кечинде Тажикстандын УКМКсынын төрагасы Саймумин Ятимов менен жолугушканын аталган органдын маалымат кызматы билдирди.
Сүйлөшүүлөрдүн жыйынтыгында, ок атышууну токтотуу жана кырдаалды басаңдатуу боюнча мурда жетишилген макулдашууларды ишке ашыруу максатында тараптар КР менен ТРнын чек ара аймактарындагы куралдуу кагылышууну жөнгө салуу жөнүндө протоколго кол коюшту.
Анда согуштук аракеттерди толук токтотуу, аскерлерди жана аскердик техниканы туруктуу жайгаштырылган жерлерине алып кетүү, чек ара заставалары менен комендатураларды биргелешип текшерүү, 14-16-сентябрда болгон куралдуу кагылышууларды тыкыр иликтөө каралган.
Чек ара аймагында тынчтыкты жана туруктуулукту тез арада калыбына келтирүү боюнча тараптардын биргелешкен иши уланууда.
Эскерте кетсек, Ташиев Таджикстанга киргенде, ал жакта кармалып жаткан кыргызстандык 4 чек ара жоокерин бошотуп келген. Маалыматка караганда, алардын абалы жакшы. Бүгүн, кечинде да тажик тарап менен жолугушуу болоору күтүлүүдө.
