Энергетика кызматкерлери Баткенде тынымсыз иштешүүдө - Достукта иштен чыккан жабдууларды калыбына келтиришти
Энергетика кызматкерлери кыргыз-тажик чегиндеги кандуу кагылыштан жабыр тарткан калктуу конуштардын электр жабдууларын калыбына келтирүүнү улантып жатышат жана учурда Достук айылындагы иштен чыккан жабдууларды дээрлик калыбына келтирип бүтүштү. Бул тууралуу “Улуттук Энергохолдинг” билдирди.
23-сентябрга карата Баткен РЭТ бригадасы тарабынан Баткен районуна караштуу Достук айылындагы калыбына келтирүү иштери аягына чыгарылды.
“Анда 10 кВ күч берүүчү трансформатору алмаштырылып, Достук көмөкчү станциясындагы зыян келтирилүүдөн улам өчүп калган 2 фидер ишке киргизилди. Андан сырткары, “Достук” 35/10/6 кВ көмөкчү станциясында 6300 кВА трансформатору алмаштырылып, ишке киргизилди. 23-сентябрга карата иштен чыккан бардык 10 кВ фридерлер оңдолду”, – дейт мекеме.
Ошондой эле Лейлек РЭТинин бригадасы Максат айылындагы зыянга учураган электр жабдууларын калыбына келтирүү менен алектенип жатат. Бүгүнкү күндө оңдоп-түзөө бригадалары тарабынан Капчагай, Масеиттин жана Көктерек айылдарындагы 10 кВ тармагы боюнча электр берүү кубаттуулуктары калыбына келтирилген.
“Турак-жайларга кирүүгө мүмкүнчүлүк алгандан кийин РЭТ бригадалары 0.4 кВ тармагы боюнча оңдоп-түзөө иштерин башташат. 2022-жылдын 20-сентябрынан баштап кирүүгө мүмкүнчүлүк берилген жерлерге калыбына келтирүү иштери үчүн 6 топ (Баткен РЭТине 4, Лейлек РЭТине 2) ишке чыккан. Ал жерден багыттуу түрдө Баткен РЭТине 6-7 бригада, Лейлек РЭТине 4 бригада болуп бөлүнүп кетишкен”, – деп айтылат “Улуттук Энергохолдинг” берген маалыматта.
Ошондой эле 20-сентябрдан баштап энергетика кызматкерлери келтирилген зыяндарды аныктоо боюнча мекемелер аралык комиссиянын курамында иштей башташкан.
Ал эми Ош облусунун Чоң-Алай районунда да электр берүү тармагы штаттык режимде иштеп жатат.
Эске сала кетсек, Кыргызстан менен Тажикстандын ортосунда чыккан жаңжалдын башталышынан тарта 6-10 кВ кубаттуулуктагы 20 чубалгы, андан сырткары, 35 кВ кубаттуулуктагы бир чубалгы өчүрүлгөн. Баткен облусунун Баткен жана Лейлек райондорундагы 39 калктуу конуш электр жарыгысыз калган.
