Кыргызстанга кызыккан россиялыктар көбөйдү - сегиз айда 170 миң орус жараны катталды
Акыркы бир жумада эле Telegram каналындагы “Кыргызстанга кош келиңиздер” (“Добро пожаловать в Кыргызстан”) тайпасына 10 миңден ашуун адам кошулду. Алардын көбү Кыргызстанга көчүүгө кызыкдар болгон россиялыктар болуп эсептелет.
21-сентябрда Россияда жарым-жартылай мобилизация жарыялангандан кийин аскер курагындагы эркектер массалык түрдө өлкөдөн чыга баштаган. Кыргызстан да Россиядан визасыз жана эл аралык паспортсуз тез келе турган өлкөлөрдүн тизмесине киргендиктен кызыгуу артты.
Санариптик өнүктүрүү министрлигинин маалыматы боюнча, 21-сентябрдан бери Россиянын 3 миң 526 жараны каттоодон өткөн. Бирок белгилей кетүүчү нерсе, бул Кыргызстанда каттоосуз жүрүүгө мүмкүн болгон 30 күндүк мөөнөтү бүтүп, кайра каттоого турууга мажбур болгон мурда келгендердин саны болуп эсептелет.
«Сентябрь айында Кыргызстанга канча орус жараны келгенин айта албайбыз, анткени биз катталгандардын санын гана эсепке алабыз. Ал эми сентябрь айында келгендер бир айдан кийин, октябрь айында гана каттала башташат», – деп баса белгиледи министрлик.
Ошол эле учурда Чек ара кызматы акыркы бир айда канча орус жараны чек арадан өттү деген суроого жооп бере алган жок.
Economist.kg Кыргызстанга көчүүгө кызыкдар болгондордун саны канчалык күчөгөнүн билүү үчүн «Добро пожаловать в Кыргызстан», тайпасынын администрациясы менен байланышты. Бул тайпада Кыргызстандын жашоосу тууралуу бардык пайдалуу маалыматтар, анын ичинде: чыгымдарды кантип эсептөө, үйдү ижарага алуу, мал алып келүү, унаа менен келүү жана башка суроолорго жоопторду камтыйт.
«Жылдын башында тайпада кошулган жарандардын агымы акырын, бирок туруктуу болчу. 20-сентябрга карата биз 4440ка жетти. 21-сентябрдан кийин кошулгандардын агымы кескин көбөйүп, тайпага дароо эле 10 миңден ашык адам кошулду. Бул сан дагы өсүүдө», – деди топтун администратору.
Бирок, ал бардык колдонуучулардын арасында маалыматтарды окуп, суроолорго жооп берген жергиликтүү колдонуучулардын кыйла көп экенин баса белгиледи, ошондуктан ал тайпа жалаң орустардан турат деп айтуу кыйын.
Орустар Кыргызстанда калууну пландап жатабы же бул өлкөнү башка өлкөлөргө өтүүчү транзиттик чекит катары эсептейби деген суроого топтун администрациясы бул маселе боюнча так маалымат жок экендигин айтты.
Ал ошондой россиялыктардын эң көп суроолору турак жай, чек арадан өтүү, каттоо, банк карталарын алуу жана баштапкы документтерге тиешелүү экенин кошумчалады.
Белгилей кетсек, Санариптик ѳнүктүрүү министрлигин маалыматы боюнча, үстүбүздѳгү жылдын сегиз айында эле РФнын 170 миң жараны каттоодон өткөн. Өткөн жылдын ушул мезгилине салыштыра турган болсок, анда 141 миң 323 адам катталган болчу.
