МИК Азиянын ипотекалык рыноктор ассоциациясынын мүчөсү болду

КРнын Мамлекеттик Ипотекалык Компаниясы расмий түрдө Азиянын ипотекалык рыноктор ассоциациясынын (ASMMA) мүчөсү болду. Бул тууралуу МИКтин маалымат кызматы билдирди.

Маалыматка караганда, Малайзиянын Куала-Лумпур шаарында Азиянын ипотекалык рыногунун ассоциациясынын (ASMMA) VIII отуруму жана “Азия аймагында жашыл турак жайды өнүктүрүү жана каржылоо” (DFGH22) конференциясы болуп өткөн. КР МИК мыкты тажрыйбаларды бөлүшүү үчүн чакырылган.

Жолугушууда «МИК» ААКнын төрайымы Аида Төлөгөнова МИКтин ишмердүүлүгү менен тааныштырып, компаниянын Азиянын ипотекалык рыноктор ассоциациясы (АСММА) менен тыгыз өз ара пайдалуу кызматташууга даярдыгын белгилеген.

“МИКтин презентациясын угуп, ASMMA мүчөлөрү бир добуштан МИК ААКсынын Азиянын ипотекалык уюмдар ассоциациясынын катарына кабыл алуу тууралуу добуш беришти. ASMMAга мүчө болуу менен компания турак жай каржылоосун колдоо мүмкүнчүлүгүнө ээ болуу менен бирге турак жай рыногун өнүктүрүү үчүн идеяларды, жаңыча көз караштарды жана тажрыйбаларды алмашуу мүмкүнчүлүгүн алат”, – деп айылат билдирүүдө.

Ошондой эле аймактык капитал рыногун интеграциялоо боюнча маалымат, идеялар, пикирлер, тажрыйбалар жана мыкты тажрыйбалар менен алмашуу аянтчасын колдонууга мүмкүнчүлүк берет.

Талкуулар ошондой эле өсүп келе жаткан шаар калкынын керектөөлөрүн канааттандыруу көйгөйлөрүнө жана инновациялык чечимдер жана жаңы жашыл технологиялар аркылуу турак-жай көйгөйлөрүн кантип чечүүгө багытталган. Конференция эл аралык жашыл каржы институттарын жана капитал рынокторун тартуу аркылуу туруктуу жана жеткиликтүү турак жайды каржылоо боюнча алдыңкы эксперттер менен эки тараптуу жолугушуулар менен аяктады.

МИК ASMMA VIII отурумунун алкагында төмөнкү макулдашууларга жетишилди:

• Cagamas (Малайзиянын Улуттук Ипотекалык Корпорациясы) менен кайтарымсыз негизде МИК кызматкерлеринин квалификациясын жогорулатууга көмөк көрсөтүү
• PMRC (Пакистан Ипотекалык Компаниясы) менен AAOIFI (Ислам финансы институттары үчүн бухгалтердик эсеп жана аудит уюму) ылайык каржы механизмдерин иштеп чыгууда жана ишке ашырууда МИКке техникалык колдоо көрсөтүү
• Монголиянын Ипотекалык Компаниясы менен жашыл каржылоо, ипотекалык кредиттерди секьюритизациялоо, ошондой эле эмиссиялык баалуу кагаздарды тышкы рынокто чыгаруу жана жайгаштыруу боюнча тажрыйба алмашуу жөнүндө.

АСММАнын VIII отурумунун жыйынтыгында Cagamas Малайзиянын Ипотекалык Корпорациясы менен КР МИКтин ортосундагы өз ара түшүнүшүү жөнүндө меморандумга кол коюу аземи болду.