Үч азык КРнын аймактарынын расмий бренди болот - бал, топоз эти жана балык
Нарын облусунун ак балы, Ысык-Көлдүн топозунун эти жана Жалал-Абад облусунун Токтогул районундагы форель чарбаларынын балыгы аталган аймактардын расмий брендине айланат.
Бул тууралуу БУУнун Азык-түлүк жана айыл чарба уюмунун (ФАО) басма сөз кызматы билдирди.
Белгиленгендей, географиялык көрсөткүч – белгилүү бир географиялык аймактан келип чыккан жана чыгарылган жери боюнча кандайдыр бир касиетке же репутацияга ээ болгон товарлардагы белги.
«Географиялык көрсөткүчкө сертификат алган учурда долбоордун алкагында тандалып алынган продукция өз аймагынын расмий бренддеринин бирине айланат. Уникалдуу рецепти бар өндүрүүчү өз продукциясын активдүү жарнамалай алат, ал эми керектөөчү продукциянын анык табигыйлыгына жана сапатына ишене алат», – деп билдирди ФАО.
ФАО тарабынан колдоого алынган Географиялык көрсөткүчтөр долбоорунун алкагында үч продукт тандалып алынган:
- Нарын облусунун ак балы
- Ысык-Көлдө өстүрүлгөн топоздун эти
- Жалал-Абад областынын Токтогул районундагы форель чарбаларынын балыктары.
Бул продукцияны өндүрүүчүлөр ФАОнун техникалык адистеринен консультациялык колдоо жана маркетинг стратегиясын жакшыртуу боюнча сунуштарды алышат.
«Белгилүү бир географиялык аймактан чыккан продукцияларды белгилөө демилгеси өтө маанилүү: жергиликтүү тургундарга сапаты келип чыккан жер менен байланышкан продукциянын потенциалын ишке ашырууга, бул жаатта биргелешкен иш-чараларды уюштурууга жардам берет. Тиешелүү нормаларды иштеп чыгуунун, экономикалык, социалдык-маданий жана экологиялык туруктуулукту чыңдоо үчүн географиялык көрсөткүчтөр системасын колдонууну түшүнүү маанилүү», – деди аталган уюмдун өкүлүнүн орун басары Динара Рахманова.
