Жогорку Кеңештин төрагалык кызматына Нурланбек Шакиев шайланды
Жогорку Кеңештин төрагалыгына депутат Нурланбек Шакиев шайланды. Бул тууралуу парламенттин маалымат кызматы билдирди.
Бюллетендерди пайдалануу менен жашыруун добуш берүүнүн жыйынтыгы боюнча Жогорку Кеңештин төрагасы болуп депутат Нурланбек Шакиев шайланды. Анын талапкерлигине Жогорку Кеңештин 80 депутаты добуш берди.
Бул боюнча ЖКнын тиешелүү токтому кабыл алынды.
Шакиев 1977-жылы Жалал-Абад облусунун, Аксы районундагы Кара-Жыгач айылында туулган. Жогорку билимдүү.
Ишмердүүлүгүн “Обон”, “Учкун”, “Эркин Тоо” гезиттеринде редактор болуудан баштап, кийин Транспорт министрлигинде жана мурдагы президент Курманбек Бакиевдин маалымат катчысы болуп иштеп келген. 2010-жылы Маданият жана маалымат министри болуп, андан кийин телеканалдарда эмгектенип келген. 2021-жылы Аксы шайлоо округунан Жогорку Кеңештин VII чакырылышынын депутаты болуп шайланган жана ал «Ата-Журт Кыргызстан» парламенттик фракциясынын лидери.
Эске салсак, бүгүн, 5-октябрда Жогорку Кеңештин жыйынында Талант Мамытов Жогорку Кеңешинин төрагасы кызмат ордунан өз каалоосу менен кеткен болчу.
Мамытов өлкөдөгү коомдук-саясий абалды турукташтыруудагы парламенттин ролу маанилүү экенин белгилеп: “Жогорку Кеңеш ар дайым эң оор мезгилде жоопкерчиликти мойнуна алып, өлкөнүн кызыкчылыгы үчүн өз милдетин так аткарып келген», – деди жана сөзүнүн аягында ал кесиптештерине көрсөтүлгөн ишеним үчүн ыраазычылык билдирип, бул кызматтан кетүү чечими өз каалоосу менен кабыл алынганын белгилеген.
