Пенсиялык фондуңузда канча акча бар экенин телефондон текшерип көрсөңүз болот - нускама
Пенсиялык топтомдор жөнүндө маалыматты (Пенсиялык топтом фонду) Электрондук кызмат көрсөтүүлөр мамлекеттик порталы же Tunduk мобилдик тиркемеси аркылуу билүүгө болот. Бул тууралуу аталган мекемеден билдиришти.
Бул кызматтын жардамы менен ар бир жаран пенсиялык топтомдорунун суммасы жана инвестициялык кирешелери жөнүндө маалымат ала алат.
КРнын Социалдык фонду Электрондук кызмат көрсөтүүлөр мамлекеттик порталы аркылуу Пенсиялык топтом фондунда канча каражат чегерилгендигин билүү үчүн акысыз кызмат көрсөтөт.
Ал үчүн:
- portal.tunduk.kg сайтына же Tunduk мобилдик тиркемеcине кирүү керек (жок болсо жүктөш керек)
- “Социалдык төлөмдөр” бөлүгүнөн “Пенсиялык топтомдор жөнүндө маалымат (Пенсиялык топтом фонду)” кызматын тандоо зарыл
- Өтүнмөнү тариздеп, жөнөтүү керек.
“Маалымат дароо сиздин телефонуңузга түшөт. Портал тарабынан берилген электрондук форматтагы бардык документтер кагаз жүзүндөгү документ же маалымкат сыяктуу эле юридикалык күчкө ээ”, – дейт “Түндүк” порталынын маалымат кызматы.
