Сеул шаарында кыргыз-корей комиссиясынын 5-жыйыны өтүүдө
Бүгүн, 6-октябрда Сеул шаарында КР Экономика жана коммерция министри Данияр Амангелдиевдин төрагалыгы алдында экономикалык кызматташуу боюнча өкмөттөр аралык кыргыз-корей комиссиясынын 5-жыйыны өтүүдө. Бул тууралуу аталган министрликтин маалымат кызматы билдирди.
Мааламтка караганда, жолугушууда эки өлкөнүн экономикалык кызматташтыгынын учурдагы абалы, ошондой эле КР менен Кореянын ортосундагы өз ара аракеттенүүнүн келечектүү багыттары талкууланууда.
“Тараптар КРда инфраструктуралык жана социалдык долбоорлорду, гранттык жана техникалык жардам долбоорлорун ишке ашыруу, түз авиакаттамдарды ачуу, бизнес-форумдарды жана бизнес-миссияларды уюштуруу, Корея тараптын катышуусу менен соода-экономикалык мамилелерди мындан ары өнүктүрүү маселелерин, республиканын санариптик трансформациясында жашыл экономика, өнөр жай, энергетика, туризм, маданият, спорт аркылуу кызматташууну да карашууда”, – дейт министрликтин басма сөз кызматы.
Ошондой эле тараптар экология, саламаттыкты сактоо, билим берүү, инновациялар, аймактарды өнүктүрүү, салыктарды башкаруу, жаштар саясаты, почта, айыл чарба жана башка тармактарда эки тараптуу мамилелерди өнүктүрүү боюнча макулдашууга жетишишкен.
