Апрель айынан бери Кыргызстандан Россияга акча которуулар үч эсеге өстү
2022-жылдын январь айынан август айына чейин Кыргызстандан Россияга 572.2 млн доллар которулган. Улуттук банктын маалыматы боюнча, өткөн жылдын ушул мезгилинде которуулардын көлөмү болгону 323 млн долларды түзгөн.
Регулятордун маалыматына таянсак, 2022-жылдын башында акча которуулар былтыркы көрсөткүчтөн көп деле ашкан эмес. Бирок апрель айынан бери кескин секирик байкалган, тагыраак айтканда, былтыркы 44.5 млн доллардан быйыл 73.3 млн долларга чейин өскөн.
Россияга которуулардын көлөмү ай сайын өсүп жатат: май айында – 80.1 млн доллар (2021-жылы 37.3 млн доллар), июнда – 82.3 млн доллар (42.5 млн доллар), июлда – 109.6 млн доллар (38.2 млн доллар) жана августта – 120.6 млн доллар (41.7 млн доллар) которулган.
