Эмгек министрлиги «Санарип көчмөн» макамын алуу үчүн 600дөн ашык арызды кабыл алды
Эмгек министрлиги “Санарип көчмөн” макамын алуу үчүн 600дөн ашык арызды кабыл алды. Бул тууралуу Эмгек, социалдык коргоо жана миграция министри Кудайберген Базарбаев билдирди.
Министр Россиянын, Азербайжандын, Армениянын, Беларустун, Молдованын жана Казакстандын IT тармагында иштеген резиденттери Кыргызстанга киргенден кийин “Санариптик көчмөндөр” катары каттала алышарын жана бул статус аларга өлкөдө өз ишмердүүлүгүн жүргүзүүгө мүмкүндүк бере тургандыгын айтты.
“Бүгүнкү күндө бизге 600дөн ашык адам кайрылды, анын 150сү бул макамды алышты, калган документтер каралууда», – деди министр.
Белгилей кетсек, Санариптик өнүктүрүү министрлигинин калкты каттоо департаментинин башчысы Нурсултан Сардарбековдун билдиргенине караганда, 2022-жылдын башынан бери Кыргызстанга 192 258 россиялык жаран келген. Анын ичинен 1631 адам Кыргызстандын жарандыгын алууга арыз берген.
