Кыргыз бийлиги, президенттин администрациясы жарандык коомдун өкүлдөрүнө, активисттерге Кемпир-Абад боюнча расмий кайрылуу жасап, кыргыз-өзбек чек ара маселеси тууралуу кенен маалымат берүүгө аларды өкмөт үйүнө чакырган.

Бүгүн, 20-октябрда аталган кыргыз-өзбек чек ара маселесине арналган жыйынга кирип чыккан активист Тилекмат Куренов өзүнүн Фейсбук баракчасында чогулуш жабык өткөнүн, ага 200дөй адам катышканын, берилген суроолорго алгылыктуу жоопторду ала албаганын билдирди.

“Мүмкүн чын эле биз оппозиция болуп алып, ич күйдүлүк кылып жатабыз го деп ойлоп бардым эле, бирок берген суроолорубузга жоопту так бере алышкан жок, ынандырып, аргумент-факттарды бере алышкан жок.

Анан баягы эле жооп берип жатып “сен оппозициясың, сенин ниетиң бузук, сен көрө албайсың, сенин акылың жетпейт” деген сөздөрдү лексиконунда колдонуп жатышты, президентибиз баш болуп. Ташиев коркутканга чейин барды. “Бул жакта эч кандай сыр жок, бардык протоколдорду ачыкка чыгаргыла” десек, ратификацияга үч күн калганда чыгара тургандыгын айтышты”, – деген ал жыйын бүтө электе чыкканын кошумчалады.