ЖК өкүлдөрү ФАО менен кызматташтыкты талкуулашты
Жогорку Кеңештин комитет төрагасы Кубанычбек Самаков жана депутат Махабат Мавлянова БУУнун Азык-түлүк жана айыл чарба уюмунун (ФАО) Кыргызстандагы өкүлү Олег Гучгельдыев менен жолугушту. Бул тууралуу ЖКнын Басма сөз кызматынан билдиришти.
Жолугушууда Кыргызстан менен ФАОнун ортосундагы кызматташтыктын учурдагы абалы каралып, аны мындан ары өнүктүрүү маселелери талкууланды.
Кубанычбек Самаков акыркы жылдары эки тараптын кызматташуусунун алкагында олуттуу жыйынтыктарга жетишилгенин белгиледи. Анын айтымында, органикалык өндүрүштү өнүктүрүү, фермерлерди жана кооперативдерди колдоо, мал чарбачылыгы менен ветеринария тармагын жакшыртуу, агроазык-түлүк секторун санариптештирүү жана климаттын өзгөрүшүнө адаптациялоо боюнча бир катар иштер жүргүзүлгөн.
Өз кезегинде депутат Махабат Мавлянова органикалык айыл чарбасын өнүктүрүү, сертификациялоо системасын жакшыртуу, мектеп тамак-ашы, жашылдандыруу жана тоо туризмин өнүктүрүү маселелерине токтолуп, бир катар сунуштарын билдирди.
ФАОнун Кыргызстандагы өкүлү Олег Гучгельдыев уюмдун негизги иш багыттары жана алдыдагы пландары тууралуу маалымат берип, Кыргызстан менен узак мөөнөттүү кызматташтыкты улантууга даяр экендигин билдирди.
