КРдагы Туризмди өнүктүрүүнү колдоо фонду ата мекендик Spark компаниясы менен туристтер үчүн RestPoint эс алуу жайларында электр унааларын заряддоочу сегиз станцияны түзүү боюнча келишимге кол койду. Бул тууралуу аталган фонддун басма сөз кызматы билдирди.

Кубаттоочу станциялар быйыл Кемин, Кажы-Сай, Нарын, Талас, Сосновка, Ош, Баткен жана Кара-Көл шаарларында пайда болот.

RestPoint жайларын уюштуруучулар келечекте өлкөнүн ар бир бекетинде ушундай кубаттоочу жай боло тургандыгына ишендиришүүдө.

Эске салсак, RestPoint эс алуу пункттары Туризмди өнүктүрүү фондунун колдоосу менен менен Нарын, Талас, Ысык-Көл, Ош, Кара-Көл, Жалал-Абад, Өзгөн жана башка шаарлардагы эң популярдуу жана эң көп туристтик шаарлар аралык каттамдарга курулуп жатат.

Жалпысынан фонд 68 эс алуу пунктун курууну пландаштырса, быйылкы жылы 21 RestPoint пайдаланууга берүү пландалууда.

• RestPoint – бул туристтер жана саякатчылар үчүн эс алуу, маалымат алуу жана гаджеттерин заряддоо мүмкүнчүлүгү бар жай. Бул жерде террасада кофе ичип же душка түшүүгө болот. Ар бир RestPoint туристтик интерактивдүү дисплей менен жабдылат, анда саякатчыларга керек болгон маршруттар жана туристтик жерлер, эс алуу зоналары жана жакын жердеги кызыктуу жайлар жөнүндө бардык маалымат камтылат.

Кошумча окуңуз:

Кыргызстандын бардык туристтик маршруттарында эс алуу бекеттери пайда болот — Телефонду кубаттап, душка түшүп, кофе ичсе болот

«Туризмди өнүктүрүү фонду» КРнын туристтик объекттери менен иштөөгө сынак жарыялады