Активисттерди камагандан маселе чечилеби? - Мирлан Самыйкожо
Кемпир-Абад суу сактагычын Өзбекстанга берүүгө каршы активдүү позицияны карманган активисттер менен саясатчыларды массалык түрдө кечээ, 23-октябрда кармап башташкан.
Камалып, үйүнө тинтүү жүргүзүлгөн активисттер тууралуу депутат Мирлан Самыйкожо Фейсбукта өзүнүн баракчасында кайрылуу жасады.
“Бүгүн биздин өлкөдө өтө ашыкча, өтө резонанстуу окуя болуптур. Ал окуя жаш активисттердин, айрым саясатчылардын жарандык коомдо өзүнүн пикирин билдиргендердин үйүнүн тинтилиши жана камалышы.
Бул эмнеден кабар берет? Ар бир адамдын оюнун, укугунун, сөз эркиндигинин камалышанан кабар берет. Аларды камоо менен аларды коркутуу менен маселе чечилеби? Эгерде алар ушунчалык коомго коркунуч, мамлекетке башаламандык же туура эмес багытты көздөп аткан болсо, алардын кылган кылыктарын ачык айтып, элге салса болбойт беле?” – деген Самыйкожо адамдын эркиндигин чектегенди кыргыз эли жакшы көрбөй тургандыгын белгиледи.
Ошондой эле ал активисттердин камалышын өтө чоң одоночулук, өтө чоң чекилик деп эсептей тургандыгын жана аларды эркиндикке чыгаруу керектигин, бардык нерсеге сүйлөшүү, мыйзамдуу жол менен жетүү зарыл деген пикирин айтты.
Бүгүн, 24-октябрда Бишкекте Кемпир-Абад суу сактагычын өткөрүп берүүгө каршы жана кечээ камалган жарандык активисттер менен саясатчыларды колдоо максатында “Реакция 5.0” деп аталган тынчтык митинги өтүүдө.
