Кыргызстан Түштүк Кореянын экспорттук-импорттук банкы менен кызматташат
Кыргызстан Түштүк Кореянын экспорттук-импорттук банкы (Эксимбанк) менен кызматташат. Бул тууралуу 23-октябрда Сеул шаарында КР Тышкы иштер министри Жээнбек Кулубаев Кореянын Эксимбанкынын Вице-президенти Пак Жонг-Кю менен жолугушуу учурунда белгилүү болду.
Жолугушуунун жүрүшүндө тараптар саламаттыкты сактоо, айыл чарба, суу менен камсыздоо жана транспорт инфраструктурасы тармагындагы артыкчылыктуу долбоорлорду илгерилетүү жана ишке ашыруу маселелерин талкуулашты, анын ичинде:
- «Айыл жерлерин суу менен камсыздоону жана санитарияны жакшыртуу»;
- Транспорт жана коммуникациялар министрлиги үчүн жол куруу техникасы жана жабдуулары
- Улуттук госпиталдын жаңы имаратын куруу жана медициналык жабдуулар менен камсыз кылуу.
Кореянын Эксимбанкы менен кызматташууну бекемдөө жана өнүктүрүү Корея менен кызматташуунун артыкчылыктуу багыттарынын бири болуп саналарын Кулубаев баса белгиледи.
“Республикалык инфекциялык клиникалык оорукананын ишин жакшыртуу” долбооруна өзгөчө көңүл бурулду. Тараптар бул долбоорду тез арада ишке киргизүү үчүн бардык күч-аракетин жумшоого макулдашышты.
Пак Жонг Кю өз кезегинде корей тарап Экономикалык өнүктүрүү боюнча кызматташуу фонду (EDCF) аркылуу долбоорлорду илгерилетүүгө жана ишке ашырууга кызыкдар экенин баса белгилеп, долбоорлорду, анын ичинде инфекциялык оорукана долбоорун илгерилетүүгө көмөктөшүүгө даяр экендигин белгиледи.
