Калк жана ишкерлер баалардын тез өсүшүнө туруштук бере албай жатышат. Бул тууралуу бүгүн, 23-ноябрда, Жогорку Кеңештин экс-депутаты Аалы Карашев азык-түлүк коопсуздугу боюнча тегерек столдо билдирди.

«Бүгүнкү күндө өлкө, калк жана ишкерлер баалардын ылдам өсүшүн кууп жете албай жатат», – деди ал.

Быйылкы жылдын 10 айында эле инфляция 12.1%ды түзүп, азык-түлүк жана алкоголсуз суусундуктардын баалары 13.1%га өскөнүн Карашев белгилеп айтты. Кумшекердин баасы 33.5%га, ун – 26.9%га, макарон жана башка дан азыктары – 22.5%га, башка сүт азыктары – 22.4%га кымбаттаганын айтты.

Бир жагынан өлкөдө орточо айлык акы 27.9%га өскөнүн, бирок ал көбөйгөн кирешенин баары азык-түлүк сатып алууга жумшалганын экс-депутат кошумчалай кетти.