Тоо текени, эликти мыйзамсыз атууга айып пул жогорулатылды

Кыргызстанда жаныбарлар дүйнөсүнө келтирилген зыян үчүн айып пулдардын өлчөмү жаңыртылды. Тиешелүү токтомго Министрлер кабинетинин төрагасы Адылбек Касымалиев кол койду.

Өкмөттүн "Жаныбарлар жана өсүмдүктөр дүйнөсүнө, мумия камтыган минералдык чийки затка жана козу карындарга юридикалык жана жеке жактар тарабынан келтирилген зыяндын ордун толтуруунун өлчөмдөрүн эсептөө боюнча тарифтерди бекитүү жөнүндө" токтомуна өзгөртүүлөр киргизилди.

Жаңы өзгөртүүлөргө ылайык:

Жаныбарлар дүйнөсүнө келтирилген зыян үчүн өндүрүлгөн каражаттарды пайдалануу тартиби такталды. Эми документ зыянды өндүрүү менен гана чектелбестен, мыйзам бузууларды аныктап, тиешелүү протоколдорду жана актыларды түзгөн адамдарды сыйлоо маселелерин да камтыйт.

Айып пулдардын өлчөмү жогорулатылды. Мыйзамсыз зыян келтирген учурларда:

• Ак илегилек — 30 миң сом;
• Кара илегилек — 30 миң сом;
• Теке — 300 миң сом (мурда 100 миң сом болгон)
• Элик — 100 миң сом (мурда 50 миң сом болгон).