Эми ар бир салык төлөөчүнүн паспорту болот - бүт маалыматтар камтылат
Мамлекеттик салык кызматы “Ишкерлердин жайгашуусунун электрондук картасы” долбоорун ишке ашыруунун алкагында экинчи этап – “Салык төлөөчүнүн паспорту (QR-код)” долбоорун ишке киргизгенин билдирди.
“Салык төлөөчүнүн паспорту” – бул салыктык сыр болуп саналбаган жана QR-коддо камтылган ишкердик субъектинин маалыматтык картасы.
Паспорт аймактык салык органдарынын кызматкерлери тарабынан экономикалык иш жүргүзүлүп жаткан ар бир соода объектисинде, жалпыга жеткиликтүү жерде, мисалы, кире бериште, витринада же кассада жайгаштырылат.
“Салык төлөөчүнүн паспортунда” жайгашкан QR-кодун смартфондон сканерден өткөрүү менен төмөнкү маалыматтарды алууга болот:
- салык төлөөчүнүн реквизиттери жөнүндө (салык төлөөчүнүн аталышы же аты-жөнү)
- ИСН жана контролдук-кассалык машинанын болушу
- жооптуу салык инспекторунун байланыш маалыматтары.
Ишкер менен керектөөчүнүн ортосунда талаш маселелер пайда болгон учурда, салык кызматынын компетенциясынын чегинде иштерди жөнгө салуу үчүн жооптуу салык инспектору менен түздөн-түз байланышса болот.
Салык кызматы “Салык төлөөчүнүн паспорту” калк тарабынан ишкерлердин ишмердигин контролдоону күчөтөрүн жана ошону менен керектөөчүлөрдүн укуктарын коргой тургандыгын билдирди.
Белгилей кетсек, “СМАРТ Салым” салык жол-жоболорун санариптештирүү долбоорунун компоненти катары “Салык төлөөчүнүн паспортун” киргизүү салыктык башкарууну өркүндөтүүгө, аналитикалык ишти жакшыртууга, ошондой эле салыктык каттоосуз жана салык төлөбөстөн экономикалык иш менен алектенген ак ниетсиз ишкерлерди натыйжалуу аныктоого мүмкүндүк берет.
